Hátæknifyrirtækið Hefring Marine hefur lokið 2,2 milljóna evra fjármögnun, jafnvirði 332 milljóna íslenskra króna. Í þessari fjármögnunarlotu tóku þátt áhugaverðir erlendir fjárfestar; Faber Ventures,Innoport VC, Two Ravens, MD-One, Riverstone Ventures, Idlewild Management LLC og Sukna Holdings. Þessi hlutafjáraukning er mikil viðurkenning fyrir Hefring og verður spennandi að fylgjast með fyrirtækinu vaxa áfram á næstu árum.
Hefring Marine var stofnað árið 2018 og fyrsta aðkoma Nýsköpunarsjóðs að félaginu var árið 2019 og svo aftur árið 2021. Hefring Marine var stofnað til að þróa leiðbeinandi siglingakerfi fyrir báta og smærri skip. Siglingakerfið er þannig hannað að sigling báts byggi á leiðbeinandi hámarkshraða sem tekur tillit til sjó- og veðurlags í rauntíma á gagnvirkan hátt. Með því að fylgja leiðbeinandi hámarkshraða getur skipstjóri dregið verulega úr líkum á slysum sem og viðhaldskostnaði sem hlýst getur af ölduhöggum vegna álags sem þau valda á bát og búnað. Kerfið getur jafnframt leiðbeint skipstjórum um ráðlagðan siglingarhraða til að draga úr eldsneytisnotkun og þá minnka kolefnisfótsporið.
Nýverið var tilkynnt um samstarf Hefring Marine og skipsamíðastöðva SAFE Boats International, Diverse MArine og Archipelago Yachts. Fyrirtækið hefur einnig átt í samstarfi við Landsbjörgu, TM og ítölsku strandgæsluna vegna búnaðarins.
Karl Birgir Björnsson, Magnús Þór Jónsson og Björn Jónsson stofnuðu Hefring en bakgrunnur þeirra er meðal annars úr rannsóknum í verkfræði, hönnun, sölu- og markaðssetningu á bátum á alþjóðlegum markaði.
