Nýsköpunarsjóðurinn Kría (NSK) auglýsti nýverið fjárfestingaátak fyrir sprota- og nýsköpunarfyrirtæki sem eru komin stutt á veg í sinni þróun. Um er því að ræða fjárfestingaátak á frumstigi sem hefur fengið heitið Frumsjóður 25. Umsóknarfrestur rann út á miðnætti þann 20. október og sóttu alls 88 sprotafyrirtæki um fjárfestingu.
Hrönn Greipsdóttir, forstjóri NSK:
„Þetta er frábær þátttaka og er reyndar í takti við það sem við áttum von á. Við höfum lengi fundið fyrir ákalli eftir auknum fjárfestingum á frumstigi og þetta átak miðar að því að fjárfest verður í það minnsta í tíu félögum gegn mótframlagi annarra fjárfesta sem er skilyrði í fjárfestingaátakinu“.
Árið 2023 stóð sjóðurinn fyrir fjárfestingaátakinu í fyrsta sinn og þá sóttu 73 fyrirtæki um fjárfestingu sem þýðir að það er aukning um 20% milli áranna. Ljóst er að það er mikil gróska í nýsköpun og þörf á því styðja betur við bakið á fyrirtækjunum og hugmyndunum á fyrstu stigum og tryggja þannig að úr verði félög sem fjárfest verður áfram í.
Nú tekur við vinna að fara yfir umsóknir sem verður í höndum sérstakrar valnefndar sem tekur bráðlega til starfa. Stefnt er að því að kynna niðurstöður í lok nóvember.
